Styrkur til Sunnu

Í dag var brotið blað í sögu Vina Indlands. Í fyrsta sinn í yfir 20 ára starfi félagsins var skrifað undir samning við utanríkisráðuneytið þar sem kveðið er á um styrk til þróunarsamvinnu að upphæð 4ra milljóna króna.
Styrkurinn er veittur til örlána verkefnisins Sunnu sem veitir lán til sjálfshjálpar jaðarhópa í Tamil Nadu í samvinnu við Action India Charitible Fund.
Félagið mun leggja til eina milljón til verkefnisins en styrkurinn frá utanríkisráðuneytinu mun gera okkur mögulegt að stækka verkefnið umtalsvert á næstu tveimur árum og fjölga lánum til einstaklinga.
Eftir stækkunina (sem jafngildir rúmlega þreföldun) getur sjóðurinn veitt allt að 1,000 ný lán á ári - ekki bara árið 2020 heldur hvert ár héðan í frá - svo lengi sem endurgreiðslur lána haldast 100%

Á myndinni eru Villhjálmur Wium deildarstjóri tvíhliða þróunarsamvinnu hjá utanríkisráðuneytinu, Kristrún Gunnarsdóttir ráðgjafi og Sólveig Jónasdóttir formaður Vina Indlands

Diwali kvöldverður

Indverska Diwali hátíðin er fjögurra daga ljósahátíð og eins og á öllum góðum hátíðum er fagnað með góðum mat. Það ætlum við einnig að gera og bjóðum öllum að taka þátt meðan húsrúm leyfir þann 26. október kl. 19:00, að Barónsstíg 3.
Á matseðlinum verða girnilegir indverskri réttir bæði vegan og kjöt. Síðan ætlar hún Dísa Guðmunds hönnuður og eigandi verslunarinnar DisDis að segja okkur frá lífinu í Indlandi en hún bjó fjölmörg ár í Pondicherry.

Verð fyrir mat er 3500 kr. en frítt fyrir börn yngri en 10 ára. söfnunarfé rennur til verkefna Vina Indlands.

Þeim sem vilja styrkja verkefnin en komast ekki á hátíðina er bent á reikninga félagsins.

Reikningur félagsins er 0582-26-6030
Kennitala: 440900-2750

Forseti Indlands í heimsókn til Íslands

Shri Ram Nath Kovind, forseti Indlands, er væntanlegur hingað til lands í opinbera heimsókn í boði forseta Íslands dagana 10. og 11. september nk. en þetta er þetta fyrsta heimsókn forseta Indlands til norræns ríkis. Hann mun flytja erindi í Hátíðarsal aðalbyggingar Háskóla Íslands þriðjudaginn 10. september kl. 11.45. Yfirskrift erindis forseta Indlands í Háskóla Íslands er „Indland og Ísland fyrir græna plánetu“ (India-Iceland for a Green Planet). 

Shri Ram Nath Kovind var kjörinn forseti Indlands árið 2017 og er fjórtándi forseti landsins. Hann var ríkisstjóri í héraðinu Bihar 2015-2017 og þingmaður í efri deild indverska þingsins á árunum 1994-2006. Forsetinn er lögfræðingur að mennt og starfaði sem slíkur áður enn hann hóf afskipti af stjórnmálum fyrir aldarfjórðungi.

Jón Atli Bendiktsson, rektor Háskóla Íslands, kynnir forseta Indlands og Ólafur Ragnar Grímsson, fv. forseti Íslands Iceland, flytur lokaorð.

Erindið er öllum opið meðan húsrúm leyfir. Við hvetjum áhugafólk um Indland til þess að mæta á erindið.

Aðalfundur 2019

Aðalfundur Vina Indlands verður þriðjudaginn 27. maí kl. 17:00. Á dagskránni er ársskýrsla, ársreikningar, kosning stjórnar og fleira skemmtilegt. Allir velkomnir. Hlökkum til að sjá ykkur.

Saga Tamil Nadu

Flest verkefni Vina Indlands á Indlandi eru í Tamil Nadu héraði á Indlandi. Tungumál þeirra og menning á sér ævafornar rætur og er Tamilska kannski með elstu tungumálum sem þekkt eru. Eftirfarandi tilvísun á myndband sem lýsir í stuttu máli sögu Tamil Nadu.

Þeir sem hafa áhuga á forleifafræði hefði kannski áhuga á að kynna sér eftirfarandi heimildarmynd sem rekur sögu landsvæða á Indlandi sem sukku í sæ í lok síðustu ísaldar.

Indverskur kvöldverður 9. feb.

Þann 9. febrúar kl. 19:00 verður blásið til kvöldverðar, í Múltikúlti, Barónsstíg 3, til styrktar góðu málefni. Að þessu sinni ætlum við að kynna í máli og myndum eitt af þeim stórkostlegu verkefnum sem félagið hefur verið svo heppið að fá að taka þátt í. Það er Sunnusjóðurinn (Sunna Micro loan project) sem hefur lánað fé til 500 kvenna til atvinnusköpunar í Suður Indlandi. Árangurinn er stórkostlegur. Komið og snæðið með okkur góðan mat og hlustum saman á Kristrúnu forsvarskonu verkefnisins segja frá árangrinum, sýna myndir og segja sögur kvennanna.

Allur ágóði kvöldverðarins rennur til Sunnu-sjóðsins.

Maturinn kostar 3000 kr., og samanstendur af indverskum réttum á hlaðborði, bæði fyrir grænkera og hina. Við munum setja inn matseðillinn þegar nær dregur.

Drykkjarföngin eru úr Gvendarbrunni en það má líka taka með sér önnur drykkjarföng 😉

Krakkar undir 10 ára borða frítt enda markmiðið að búa til sannkallaða fjölskyldustemningu.

Ungur gítarleikari úr FÍH mun spila fyrir okkur á undan kynningunni.

Húsnæðið okkar tekur um 50-60 manns. Svo reglan fyrstur kemur fyrstur fær gildir. Það má líka tilkynna hér hverjir ætla örugglega að koma og við getum tekið frá sæti. Hlökkum óheyrilega til að sjá ykkur.

Indverskur kvöldverður 3. nóvember 2018

Laugardagskvöldið 3. nóvember n.k. kl. 19:00 munum við bera fram fjölmarga gómsæta indverska rétti við allra hæfi, í húsnæði Múltikúlti Barónsstíg 3. Verðið er 3000 kr. Frítt fyrir börn 6 ára og yngri. Allt fé rennur til jólahalds á heimilunum sem við styðjum í Tamil Nadu. Hlökkum til að sjá ykkur. Opið meðan húsrúm leyfir.

Við bjóðum upp á gómsætan indverskan kvöldverð til styrktar fyrir heimilin okkar í suður Indlandi. Við ætlum að elda vegan og non vegan útgáfu af indverskum hátíðarréttum enda "veganið" fundið upp í Indlandi.

Sjálfboðaliðaferðir 2019

Múltikúlti hefur undanfarin ár staðið fyrir sjálfboðaliðaferðum til Indlands, Kenía og Tansaníu og verður boðið upp á slíkar ferðir 2019. Ferðirnar eru ætlaðar fyrir ungt fólk á aldrinum 18 til 25 ára, geta verið frá 3 vikum upp í 2 mánuði, ýmist í einu þessara landa eða þeim öllum og eru hóparnir frá 3 til 10 manns. Verkefnin geta verið af ýmsum toga, aðstoð á leikskólum og skólum, vinna í fræðslustarfi með sjálfboðaliðum á staðnum, auk ýmissa tilfallandi verkefna sem tengjast heilbrigðismálum o.fl. Þá kynnast þátttakendur menningu þjóðanna í gegnum heimsókn, t.d. í þjóðgarð í Kenía eða Tansaníu og hof á Indlandi, eiga kost á ýmissi afþreyingu, eins og kajakferðum á Viktoríuvatni, auk þess að kynnast daglegu lífi heimamanna í gegnum samstarfið.

Þátttakendur sitja undirbúningsfundi og -námskeið hérna heima, alls 30 klukkustundir, áður en lagt er af stað.

Fyrirhugaðir eru þrír brottfarartímar á árinu 2019, um miðjan janúar, miðjan júní og byrjun september.

Nánari upplýsingar: 8471703 (Særún) eða multikultiferdir@gmail.com