Ný kennslubók í Hindi

Út er komin kennslubók í Hindi fyrir Íslendinga. Bókin heitir Step into Hindi - A simplified journey for Icelandic speakers og er höfundur hennar Dr. Shilpa Khatri Babbar, ICCR Chair of Indian Studies/ICCR og gestakennari í indverskum fræðum við Háskóla Íslands sl. 3 ár. Í Háskóla Íslands hefur hún kennt námskeið um indverska menningu, auk þess að kenna námskeið í hindi og halda aðra fyrirlestra í Háskólanum um ýmis indversk málefni. Þessi nýja kennslubók var kynnt með viðhöfn í Indverska sendiráðinu þann 30. maí sl. og er myndin hér að ofan tekin af höfundi við það tilefni. Það er mjög ánægjulegt að Shilpa hafi tekið saman þessa kennslubók í hindi fyrir Íslendinga og mun þessi kennslubók eflaust efla tengsl milli Íslands og Indlands á næstu árum. Þess má geta að bæði hindi og íslenska eru indó-evrópsk tungumál þannig að skyldleiki eru á milli þeirra. Þó svo að þú finnir kannski ekki svar við því, í þessi kennslubók, hvernig þetta samband íslensku og hindi er tilkomið. Í bókinni má hins vegar m.a. lesa að íslenska orðið þú er tú á hindi, íslenska orðið samband er sambandh á hindi og íslenska orðið svar er til í hindi en hefur merkinguna hljóð eða rödd. Þannig að samband milli tungumálanna er meira en ætla mætti við fyrstu sýn.

Kennslubókin er aðgengileg öllum án endurgjalds á vef Tungumálamiðstöðvar Háskóla Íslands. Hérna er tengill á bókina.